Ina caracteristica dils vitgs sursilvans ein las casas da lenn. Il clima, l’economia ed il material da construcziun indigen han dau alla casa sia fuorma specifica. Las pli veglias casas da nos vitgs dateschan dil 18avel tschentaner. La structura e la fuorma dalla casa sursilvana ein denton pli veglias. Ils elements che dattan fuorma ein surtut il sochel da mir, las preits da lenn, las fueinas ed il tetg. En nos vitgs dat ei aunc da quellas bialas casas da lenn tradiziunalas culla decoraziun tipica per nossa regiun.
Las casas havevan tuttas circa la medema structura. El plaunterren sesanflava il tschaler. Cheu vegneva conservau purment, truffels e puma. Sill’emprema alzada vegneva habitau. La stiva ed il „stebli“ sesanflavan davontier el sulegl; la cuschina, la tgaminada ed il pistregn eran da l’autra vart dil zuler en l’umbriva. Silla secunda alzada sesanflavan las combras. En combra da carn vegneva buca conservau mo la carn, mobein era autra vivonda, ch’astgava buca vegnir humida. Il surcombras surveva sco magasin per da tuttas sorts urdeins.
