Agrum in Ardunae (=èr a Dardin), aschia vegn il vitg presentaus el testament da Tello. Il vitg da Dardin secumpona dils uclauns Casut, Casu, Capaul, Caprè, Gliz (Caglieci) e Capeder. Els ein situai per liung dalla via veglia da Schlans a Breil. Dardin ha manteniu siu caracter puril entochen il di dad oz. Aschia ha era la veglia substanza architectonica saviu vegnir conservada. Da menziunar specialmein ein las casas dil 18avel tschentaner tardiv els uclauns da Capaul, Gliz e Capeder. Il habitadi da Pugaus (Arpagaus) ei vegnius bandunaus igl onn 1800.
El caraun dalla via denter Danis e Dardin sesaulza il Grep Patnasa. Sin quel anflan ins craps-scalutta prehistorics. Ei setracta da ca. 30 cuppas cun in diameter denter 5 e 30 cm. Il num Patnasa ni Patnal ei preromans e munta ton sco casti ni fortezia. Entochen oz han ins aunc buca anflau fastitgs dad in habitadi.
Naven da 1664 fuorma Dardin ina atgna pleiv dedicada a S. Bistgaun. L’entschatta 2016 ein las treis pleivs dalla vischnaunca da Breil vegnidas fusiunadas.
Per promover ‚agricultura ei la meglieraziun generala vegnida iniziada igl onn 1992.
