Dapi la stad 1998 regorda il monument commemorativ digl architect indigen Rico Carigiet, a Giacun Hasper Muoth. Cun siu project „La brama“ ei igl architect s’occupaus intensivamein dall’ovra dil prenci-poet. Encunter la via vegn il plaz protegius da petgas da granit, aschia che la vesta sin la casa paterna, ils praus ed il lag resta aviarta. Las plattas grischas representan la cadeina da cuolms da Breil. Ellas ein era ina protecziun encunter la via e la canera. Il secund simbol pli ferm ei la fontauna cun la flomma d’aua. Ella simbolisescha la brama da Muoth per siu vitg natal, per sia patria e sia viarva romontscha. Ils dus blocs da granit, tschentai per liung envidan da seser e ruassar. Cura ch’igl ei ruasseivel san ins udir ord il tschallatar dall’aua il lungatg romontsch.
