Perdanonza cuntegn il plaid „perdun“. Cun separticipar alla perdanonza savev’ins pia gudignar perduns. Il secund plaid zuppaus ella perdanonza savess esser „l’abundonza“. Lezza noziun fa allusiun a l’auter intent da quella fiasta: las emperneivlas sentupadas, il bien gentar da perdanonza, il festivar da cuminonza, il star da cumpignia. Cun la perdanonza festiveschan las pleivs lur patrun-baselgia. Ellas pleivs dalla vischnaunca da Breil han quellas fiastas liug:
– dumengia dil Scapulier a Dardin (miez fenadur),
– da Nossadunna d’uost a Breil (15 d’uost),
– dumengia dalla ss. Trinitad (dumengia suenter Nossadunna d’uost).
Decuors dil di da perdanonza a Breil
Il di da Nossadunna d’uost dedestan ils murtès e tut ils zenns il vitg da Breil gia allas tschun dalla damaun. Allas diesch ei messa festiva cul cant dil Chor baselgia e suenter suonda la processiun accumpignada dalla Societad da musica e dalla parada dall’Uniun da giuventetgna. La musica, il cant, ils cafanuns e la statua da Nossadunna dattan ina tempra tut speciala alla processiun. Amiez il Plaun Rueun benedescha il spiritual il pievel da fiasta e la cultira. Lu cuntinuescha la processiun tochen sin Cadruvi. Culla benedicziun finala e la canzun dil Tutpussent altissim Diu vegn la raspada relaschada al beinmeritau gentar da perdanonza.
Allas treis vegn cantau viaspras romontschas en honur da Nossadunna. Lu suonda in pign concert dalla Societad da musica sin Cadruvi, duront il qual il sentupar, sediscuorer e sedivertir vegn buca alla cuorta. La perdanonza terminescha cul tuccar festiv dad Ave Maria la sera allas otg.
