Ella broschura Uorden ed organisaziun dallas processiuns edida dil cussegl pastoral dallas pleivs dalla vischnaunca da Breil san ins denter auter leger il suandont: Il semetter sin via ed esser sin via ein maletgs ch’ins entaupa savens ella Bibla. Numerusas ein las vias che resdan dil Diu ch’ei sin via cun ses carstgauns. Quei esser sin viadi sco cartents vulan las processiuns oravontut far veseivel. Dieus tarmetta nus sin via, e cun el e sia benedicziun essan nus sin via e mein nies viadi dalla veta. Quei ei il patratg il pli central che stat davos las processiuns.
Las cruschs (cafanuns) che vegnan purtadas da processiun ein simbols che muossan co nies viadi ei era signaus dalla crusch, mo cuntegn gia la speronza pascala che Cristus victorisescha era en nus. Bandieras, cafanuns, las statuas da Maria e dils sogns regordan nus vid il fatg che nus essan adina e dapertut era cumpignai dalla mumma da Jesus e dils sogns.
A Breil vegnan ils nov cafanuns adina purtai dallas medemas famiglias, las qualas ein era responsablas pil manteniment e las renovaziuns da tals.
Dallas numerusas processiuns che havevan liug entochen viaden ils onns 60 ein aunc tschun restadas en las pleivs dalla vischnaunca da Breil:
– processiun da Venderdis sogn a Breil
– processiun dallas Rogaziuns a Breil, Dardin e Danis-Tavanasa
– processiun da Sontgilcrest a Breil, Dardin e Danis-Tavanasa
– processiuns da perdanonza a Breil, Dardin e Danis-Tavanasa
– processiun da dumengia dil Rusari a Breil e Danis-Tavanasa.
