L’entschatta dalla mecanisaziun enamiez il tschentaner vargau, ha giu per consequenza che las tradiziuns purilas ein svanidas pli e pli. Ina tradiziun che ha pudiu subsister e gauda oz gronda attenziun ein las scargadas. Quei ei ei era a Breil il cass.
Las vaccas dall’Alp Quader sin via tras il vitg
Cun transferir il liug da scargada naven dils cuolms Muliniala giu el vitg ha quella retschiert dapli calamita e s’auda sil calender d’occurrenzas dad jester e dumiesti. Quei fatg ei segiramein era d’attribuir allas puras ed als purs sco era a pasturas e pasturs che preparan las sargadas cun gronda premura ed attenziun. Cun organisar ina ustria sil plaz da scargada a Plaun Rueun attrai la scargada da Breil mintg’onn in pievelun d’aspectaturas ed aspectaturs.
Tut las alps sepresentan al publicum. Biars animals ein fittai cun bellezia tschupials e portan grondas bransinas ni platialas cun curegias surcusidas da bials ornaments. Era la successiun dallas alps ei tradiziunala: A mesa las endisch dat l’Alp Tschegn dadens l’entschatta, lu suondan Alp nova, Alp Rubi, Alp Quader e l‘ Alp Tschegn dado. Tut la biestga vegn catschada els claus da Plaun Rueun. Tochen alla fin seporscha in imposant maletg cun varga 600 tgaus biestga.
Suenter miezdi vi entscheivan ils purs cun la zavrada e semettan cun lur muvel sin via a casa. Suenter la zavrada bandunan era ils numerus hosps il plaz da fiasta. Quei eveniment vegn era propagaus sco attracziun turistica – e quei cun raschun. Era cheu semuossa che l’agricultura ed il turissem san viver bein in sper l’auter.
