Aunc igl onn 1910 deva ei ella vischnaunca da Breil buca meins 121 menaschis purils e dasperas aunc 66 famiglias che tenevan zatgei tiers manedels, silmeins in engarschaun. Sper ils purs deva ei en tut ils vischinadis ils tipics mistergners che producevan e reparavan tut quei ch’il pur duvrava: naven dils carpiens tochen tiels ristials. In pèr tipics mistergners da purs duein vegnir presentai en quei liug – ina cultura ch’ei deplorablamein ida alla fin cun la mecanisaziun dils menaschis purils ils onns 60 dil tschentaner vargau.
