Ils Treis Sogn Retgs
Da Buania tgiran ils affons dallas treis fracziuns – sco en numerusas autras regiuns – in usit popular. Ils Treis Sogns Retgs van casa per casa e contan canzuns novas e veglias per annunziar l’arrivada dil Spindrader.
A Breil ei sesviluppada el decuors dils onns ina gruppa illustra. Ils Treis Sogns Retgs vegnan accumpignai dad „aults officiers“. Quels regordan allas renomadas schlattas de Latour e Balletta da Breil che han fatg carriera militara en survetschs jasters. Il portasteila ed il catschatuts ein medemamein vestgi a moda militara. La gruppa fa ina pareta aristocrata ed ei organisada hierachicamein. In buob (ni ina buoba) pli grond ei il capitani. El camonda la truppa ed ei responsabels per l’organisaziun dalla sera.
Era a Danis-Tavanasa vegn la gruppa menada dil capitani. La schuldada ei vestgida en ner, porta sin tgau in chepi e vid la tschenta penda la bajonetta ella teigia. Plinavon fan secapescha era ils Treis Sogns Retgs ed ils portasteila part dalla gruppa. Ferton ch’ils officiers da Breil train la spada duront cantar las canzuns, drova la schuldada da Danis-Tavanasa lur spadas schizun per in cuort duel. Quel ha mintgamai liug denter las duas canzuns.
