Igl usit „Trer schibettas“ dariva dil temps precristian. El exista mo pli en treis loghens dil cantun Grischun, denter auter era a Danis-Tavanasa ed a Dardin. Ils emprems avdonts dalla val cartevan da saver influenzar il cuors dil sulegl cun lur schibettas ardentas e da survegnir aschia ina megliera raccolta. Ultra da quei vulevan els scatschar ils nauschasperts digl unviern.
Aunc oz derasa quei usit grond plascher a pign e grond. Duront il liung unviern preparan ils buobs schibettas rodundas d’ogna cun ina ruosna enamiez. L’emprema sonda dalla cureisma van els in toc sur il vitg siadora, si Chistatscha. Leu tegnan els las schibettas sur il fiug entochen ch’ellas ardan. Lu tilan igl emprem ils buobs e silsuenter ils giuvenots dil vitg las schibas viadora ella stgiraglia. Duront il sgol dallas schibettas cloman els lur giavischs e salids viado el stgir dalla notg:“Oh, tgei biala schibetta per la Daniela!“ Cura ch’ils buobs ed ils giuvens ein puspei arrivai el vitg surveschan las buobas e mattas patlaunas frestgas, groma e caffè.
