La particularitad dils ruvrius da Bacuns e Danis
Las cuntradas d’uaul multifaras, sco quellas denter Breil e Tavanasa, contribueschan essenzialmein alla biodiversitad. Cheu alterneschan ruvrius, uauls da badugna e fraissens, caglioma, praus schetgs e pastiras. En quei territori denter 800 e 1’200 m s.m. sesanflan treis dils pli bials uvrius dil cantun Grischun: igl Uvreu da Bacuns, igl Uvreu da Danis ed igl Uvreu dil Grep Tschitschè.
Quels nums locals dattan perdetga che la populaziun haveva gia avon tschiens onns ina relaziun speciala culs uauls da ruvra. Probabalmein ei il ruver vegnius promovius da quei temps fermamein entras plontaziuns ni semenzas. Quellas plontas che creschan bugen sin spundas carpusas e teissas ein fetg robustas e stabilas, vegnan fetg veglias e protegian bein encunter curdada da crappa. Perquei han ils habitonts da quels onns probabel sviluppau pils ruvers in sentiment tut special denter nizzeivladad e veneraziun, ina sort mitos. Aschia era ei scumandau da pinar ruvers gross els vegls ruvrius da Bacuns e Danis. Ils pli voluminus ein schizun stai tabu duront ils onns d’uiara cura che la vischnaunca stueva furnir ils contingents prescrets pil provediment dalla tiara. Aunc oz san ins observar en quels ruvrius plontas cun ina vegliadetgna da 300 entochen 400 onns. Quels ruvers han in diameter da varga 1 meter ed in’altezia respectabal da circa 20 meters.
