Il Grep da Plaids – sco ina cuntrada da brutg nordica
La cadeina da crests greppus egl ost dalla Val Plaunca denter Tuliu e Runca senumna Grep da Plaids. Encunter sid ein las preits dil grep da Dolomit verticalas. Sut quellas dattan las gondas, las cavas ed ils clutgers d’erosiun da corniola en egl.
Ils grugns e las gondas ein per part cuvretgs cun zundra. Sin las plauncas pli stabilas creschan tulius cun brutg (erica). Grazia alla formaziun da terren ein sesviluppai uauls da pégns cun brutg, caretsch alv e larmas pendusas. La pintga planira sin il Grep da Plaids semeglia fetg ina pastira nordica. Leu sederasan sper zundra e pégns graschels era brutg, fletga selvatga e geneivers cumins. Quei ein indezis per in terren asch e magher. Naven dil Grep da Plaids han ins ina bellezia vesta sin la Val dil Rein anteriur, la terrassa da Sursaissa e las cadeinas dils cuolms vischinonts.
Plaun da Plaids
Denter la spunda dil Grep da Plaids e la spunda enviers Tschegn dadens sesanfla il Plaun da Plaids. Ferton che la part egl ost ei cuvretga d’ina paliu ei il rest dil plaun cuvretgs cun bien terren da pastira. Il Plaun da Plaids ei bein contonschibels naven da Breil, Dardin e Schlans. Ha el tras quei survegniu quei num? Muort la buna pastira han quels treis vitgs giu da parter beinequalga nauschs plaids tgi che astgi insumma utilisar quei territori sco pastira.
 |
