Oriundamein cumpigliava la pleiv da Breil il territori dad oz dalla vischnaunca da Breil e dil vitg da Schlans. Schlans ei sedistaccaus igl onn 1518 ecclesiasticamein e pli tard era politicamein da Breil. 1584 ei vegnida inaugurada a Danis ina pintga baselgia en honur dalla Ss. Trinitad. Dus motivs han intimau igl avat da far quei pass: per l’ina era il vitg da Danis-Tavanasa carschius ed ils habitonts vulevan buca ir la via teissa entochern Breil alla baselgia parochiala. Per l’autra vuleva igl avat evitar ch’ils parochians ella val midien alla nova cardientscha. Igl onn 1650 ei la pleiv da Danis-Tavanasa sedistaccada definitivamein da Breil. Quitordisch onns pli tard ei era la pleiv da Dardin daventada autonoma. Politicamein han ils treis vitgs denton adina collaborau a moda pli u meins intensiva.
Duront tschentaners ein las treis pleivs stadas independentas, havevan agen plevon e temporarmein schizun in agen caplon. La religiun vegneva praticada pli intensivamein che ozilgi. Cun l’entschatta dil 21avel tschentaner ei quei puspei semidau. Muort la scartezia da spirituals, la movibladad individuala e la pratica meins intensiva da cartents e cartentas ha pretendiu ed accelerau la collaboraziun. Naven da 2016 duein la treis pleivs puspei vegnir fusiunadas. Egl artechel 1 dalla constituziun nova stat: Las persunas catolicas sesentas ella vischnaunca da Breil fuorman la vischnaunca da pleiv catolic-romana da Breil – Dardin – Danis/Tavanasa. Ils cunfins secuarclan cun quels dalla vischnaunca politica da Breil. Cun Daniev 2019 ha la pleiv d’Andiast fusiunau cun la pleiv da Breil. La quater anteriuras pleivs senumna Pleiv catolica romana Breil.
Dapli informaziun:
Pleiv catolica romana Breil
Pleiv evangelica Vuorz
