 |
Per finir
Ils quens corrects e reparti, Sempla fiasta e finiziun D’engraziar, buc d’emblidar, |
Alexander Maissen ei naschius igl onn 1929 a Dardin-Capeder. Igl onn 1950 ha el fatg la matura al gimnasi dalla Scola claustrala a Mustér. Il studi da veterinari a Berna ha el terminal cugl examen dil stadi igl onn 1955. Suenter dus onns sco praticant ed assistent ha el aviert igl onn 1958 ina pratica a Glion. Cheu ha el luvrau sco veterinari entochen 1995. Da 1981 entochen 1985 ei Alexander Maissen staus mistral e da 1983 entochen 1989 deputau dil cumin dalla Foppa. El viva ensemen cun sia dunna a Glion.
Igl onn 2004 edescha Alexander Maissen l’emprema rimnada da poesias el cudisch ier ed oz cun illustraziuns da Rudolf Mirer. La secunda rischlada cun varga 150 poesias cumpara el Tschespet 76 cul tetel Ragischs. Per las illustraziuns ei Armin Albin staus responsabels.
El plaid sin via pil Tschesper 76 scriva Alberto Palaia denter auter: Las poesias d’Alexander Maissen ein ina mischeida dad experientschas persunalas e schabetgs ch’el ha viviu sco aspectatur neutral, ellas han tratgs autobiográfico, per part historics, per part politics. Ellas ein perdetga da sia veta, da quei che ei stau ed ei impurtont per el, dallas persunas ch’el ha entupau ed enconuschiu el decuors dils onns. Sia ovra ei in omagi ad in mund ch’ei per part buc pli, ina reverenza a sia patria, alla Surselva e sia natira, pia a sias ragischs.
Otg poesias ord il Tschespet 76 ein publicadas all’entschatta dils capetels da quella pagina virtuala.
