Cuort suenter la finiziun dall’emprema via da colligiaziun carrabla ella val, ha la vischnaunca schau realisar il curtgin cul crap da granit enamiez. Quei oravontut sco engraziament als treis umens ch’ein s’engaschai aschi generusamein per la via ed han accellerau la construcziun da quella.
 |
VIA CONDITA 1870 AUXILIO
via construida 1870 cun sustegn da
|
Alois de Latour, 1805-1875
El ha studegiau a Berlin, Jena e Heidelberg ed ha viviu a Breil sco giurist. El ei s’engaschaus cun forza per la modernisaziun dallas vias, dall’ agricultura e dallas scolas popularas. Duront sia veta ha el occupau tut ils uffecis publics d’impurtonza: deputau el Cussegl grond, mistral, derschader, cusseglier guvernativ, cusseglier naziunal, cusseglier dils stans. El ha apparteniu all’ala seniastra dalla partida liberal-catolica. A Breil vegneva el numnaus il ‘’landrehter giuven’’.
Arnold Escher von der Linth, 1807-1872
Il sulet fegl da Hans Konrad Escher von der Linth ei staus professer per geologia alla Scola politecnica da Turitg. Sco emprem scienziau ha el perscrutau sistematicamein la geologia dallas Alps svizras ed ei s’engaschaus per il manteniment dils uauls da protecziun alpins. Sco amitg da studi dad Alois de Latour passentava el bugen siu temps liber a Breil. Igl onn 1857 ha el maridau la Sabina Maria Barbara (Bina) de Latour (1807-1863), ina sora dad Alois.
Simeon Bavier, 1825-1896
Sco inschignier dil cantun Grischun eis el staus il collaboratur digl inschignier superiur Richard La Nicca. En quella funcziun ha el contribuiu a moda essenziala all’ amplificaziun dalla reit da vias cantunala. Pervia da ses studis e sias activitads valeva el da siu temps sco expert da traffic. Sia carriera politica ha el entschiet sco deputau el Cussegl grond ed ha terminau quella igl onn 1883 sco cusseglier federal.
Ils hosps da vacanzas han fatg beinsavens lur spassegiadas ora la Crusch e gudiu la bellezia survesta naven dil ‘’Belvedere’’, sco els numnavan quella «scantschala». Georg Finsler resumescha ina spassegiada da sera en Curtgin Crest La Crusch sco suonda:
Der Abendspaziergang, auf dem ich zum ersten Mal in das Vorderrheinthal hinuntersah, gehört zu meinen schönsten Erinnerungen von Brigels. Tief unten windet sich der Rhein, die Brücke von Tavanasa scheint durch einen Sprung erreichbar; gegenüber auf dem Plateau von Obersaxen, reihen sich Dörfchen aneinander, darüber die Kette des Piz Mundaun, von der sich Bäche ins Thal stürzen. Bis hinauf nach Disentis und hinunter nach Ilanz liegt das ganze Thal vor uns; Schneeberge schliessen auf beiden Seiten das Bild ab. Das Schönste aber war eben doch der tiefe Friede, die heilige Ruhe, die über dem ganzen schwebte.
