Egl ost dil vitg da Breil sesanfla il bellezia punct panoramic Crest la Crusch. Amiez quei grondius curtgin circumdaus d’ina seiv sesaulza in crap da granit cun ina crusch fier. El crap ei scalprau la suandonta inscripziun:
| Via condita 1870 auxilio A. Escher a Linth S. Bavier A. de Latour |
Quei curtgin ha la vischnaunca da Breil schau realisar cuort suenter la finiziun dall’emprema via da colligiaziun carrabla ella val, sco engraziament als treis umens ch’ein s’engaschai fermamein per la via ed han possibilitau ed accellerau la construcziun da quella. La stad 1870 ei la via vegnida aviarta, ed igl october eis ella vegnida inaugurada cun ina pintga fiasta, naturalmein en preschientscha dils treis gronds promoturs. Quels treis umens han buca mo promoviu la construcziun da quella via, mobein ein s’engaschai duront lur entira veta en favur Dallas regiuns muntagnardas. Il monument en quei curtgin cun ina bellezia vesta sill’entira Surselva han els meritau cumpleinamein.
