Batten
Ozilgi ei il batten ina fiasta da famiglia. Quei era inaga tut auter. Muort la tema da stuer schar murir in affon buca battegiau haveva il batten da succeder schi spert sco pusseivel suenter la naschientscha. Padrin e madretscha purtavan gl’affon en baselgia per schar battegiar, magari accumpignai dil bab.
Maridaglia
Circa in onn avon las nozzas vegneva fatg spusalezi. Quel vegneva festivaus cun ina tscheina el ravugl da famiglia. Treis jamnas avon las nozzas vegneva „clamau ô“; ils nums dils nozzadurs vegnevan clamai treis ga da messa giud scantschala. Lu vegenvan ils nozzadurs per treis jamnas „en scaffa“. Quella publicaziun fageva il canzlist.
Mort e sepultura
La bara restava en casa entochen il di da sepultura. Entochen ch’il scrinari haveva fatg il vischi schischeva il miert sil baun dils morts. La stiva vegneva emplenida cun sutgas e preparada per las visetas da parents, enconuschents e vischins che vegnevan a „dir rusari“. La bara vegneva vegliada di e notg cun dir rusari, far oraziun ni en silenzi.
