Tgei ei architectura moderna?
1987 ei in baghetg niev all’entrada dil vitg da Breil – che ha dau bia da discutar – vegnius distinguius cul Premi d’architectura Grischun. Forsa ch’il rapport e l’undrientscha dalla giuria san dar la risposta.
La casa dubla, situada all’entrada dil vitg, ha la fuorma d’in sempel cubus ed ei pustada cun l’ala tetg encunter la spunda. La profunditad dalla construcziun relativamein pintga ha lubiu d’integrar igl edifezi ella cuntrada senza pli grondas midadas da terren.
Cun duvrar crappa da betun pils mirs veseivels el plaun sut e cuvierer la fatschada dils plauns su cun in manti da lenn, ventialus davostier, han ins differenziau viers igl exteriur ils dus secturs d’utilisaziun. Ils balcuns davon e la lautga davos sustegnan aunc la finezia dalla structura dalla construcziun principala.
Undrientscha
La casa dubla simmetrica perschuada tras sia clara posiziun sil crest e l’elavuraziun cunscienziusa. Il manti en lenn ei adequats alla funcziun ed evitescha tuttas avischinaziuns a construcziuns cun quaders. La casa ei in exempel per la nobla sempladad d’ina construcziun moderna en in vitg da muntogna.
