Igl onn 765 vegn Tavanasa numnaus Abbatissae ed en in document da 1470 ei d’anflar il num Thafanatzen. Tavanasa ei in tipic vitg construius suenter la via. El s’extenda, leu nua ch’il Rein fa in caraun, per liung dil pei dalla spunda umbrivauna. Il terren d’agricultura ei adina staus plitost scarts a Tavanasa, perquei ei sesviluppada en quei vitg ina liunga tradiziun da buns e capavels mistergners. L’avertura dalla staziun dalla Viafier retica igl onn 1912 ha favorisau quei fatg e possibilitau a Tavanasa da sesviluppar ad in impurtont center da marcanzia e mistregn. Igl onn 1927 destruescha ina gronda bova la renomada punt digl architect Maillart. Siat persunas vegnan per la veta.
Pigl auter ei la historia da Tavanasa colligiada fetg vid il vitg da Danis. Tavanasa ha era tgirau buns contacts culs convischins da Sursaissa, oravontut culs habitonts da Cathomen ni Tomahüs per tudestg. Quei uclaun ha apparteniu alla vischnaunca da Breil entochen igl onn 2003. Lu ei Tomahüs vegnius vendius ed incorporaus alla vischnaunca da Sursaissa.
Sch’ins discuora da Danis-Tavanasa patratg’ins era da Mutteins, igl uclaun da l’autra vart dil Rein. Sper las casas silla plaunca sulegliva, scatta el plaun visavi il center d’industria dalla vischnaunca. Tavanasa ei quella fracziun che senta il pli fetg la digren dalla populaziun.
