El testament da Tello vegn „Andeste“ numnaus per l’emprema ga. El temps medieval dumbrava il vischinadi siat singulas cuorts: Curnengia, Capuot, Camenisch, Curtginatsch, Calaser, Vitg, Carnugl. Economicamein era el colligiaus cun Vuorz.
Andiast ha apparteniu al domini da differents signurs: entuorn 1200 a quels da Grünenfels, pli tard a quels da Montalt, dapi 1378 al signuradi da Vuorz e dapi 1472 alla claustra da Mustér. In document digl onn 1472 attesta era ch’ei deva minieras ella Val Tschegn. Da 1429 entochen 1734 ha Andiast fatg part dil cumin da Vuorz e silsuenter da quel da Rueun.
La baselgia parochiala vegn documentada igl onn 1461. Patruns baselgia ein s. Giulitta e s. Quiricus. Entochen 1526 ei Andiast staus unius ecclesisaticamein culla pleiv da Vuorz. En consequenza dad ina decisiun dalla dertgira d’appellaziun dalla Ligia Grischa dils 1526 ein differentas caplanias separadas da lur pleiv materna, aschia era Andiast da Vuorz. Suenter che Vuorz ei sedecidius per la reformaziun ei Andiast vegnius pastoraus naven da Rueun entochen igl onn 1628. Las differenzas pervia dalla cardientscha han provocau diversas dispetas duront plirs tschentaners.
Igl onn 1956 decida la vischnaunca purila ina meglieraziun generala dil funs. Quei project vegn terminaus diesch onns pli tard. 1972 ha Andiast fundau ensemen cun las vischnauncas da Breil e Vuorz la Societad runals e sutgeras Péz d’Artgas SA, oz Pendicularas Breil-Vuorz-Andiast SA.
