Ils davos onns selegran las scargadas dallas alps d’adina dapli calamita. Quei fatg ei segiramein d’attribuir allas puras ed als purs sco era a pasturas e pasturs che preparan las sargadas cun gronda premura ed attenziun.
Era ils purs da Breil han midau quei usit e transferiu la scargada naven dil cuolm Muliniala giu amiez il vitg. Cun organisar ina ustria sil plaz da scargada a Plaun Rueun attrai la scargada da Breil mintg’onn in pievelun d’aspectaturas ed aspectaturs.
Suenter intensiva preparaziun ha la sargada mintgamai liug ina sonda da miez settember. Sche l’aura semuossa era da buna luna, lu ei la fiasta dalla scargada veramein in spectachel e gaudi per pign e grond.
Tut las alps sepresentan al publicum. Biars animals ein fittai cun bellezia tschupials e portan grondas bransinas ni platialas cun curegias surcusidas da bials ornaments. Era la successiun dallas alps ei tradiziunala: A mesa las endisch dat l’Alp Tschegn dadens l’entschatta, lu suondan Alp nova, Alp Rubi, Alp Quader e l‘ Alp Tschegn dado. Tut la biestga vegn catschada els claus da Plaun Rueun. Tochen alla fin seporscha in imposant maletg cun varga 600 tgaus biestga.
Suenter miezdi vi entscheivan ils purs cun la zavrada e semettan cun lur muvel sin via a casa. Suenter la zavrada bandunan era ils numerus hosps il plaz da fiasta. Quei eveniment vegn era propagaus sco attracziun turistica – e quei cun raschun. Era cheu semuossa adina puspei che l’agricultura ed il turissem san viver bein in sper l’auter.
Las alps da vischnaunc’ein scargadas,
Las tegias puspei bandunadas.
Pasturs han surdau la muaglia,
Uss ein relaschai da travaglia.
