Duas sendas historicas
Las sendas historicas ein ina purschida per indignes e hosps, per pign e grond. In e scadin ei envidaus da guder in mument en la biala natira, da viagiar cun egl ed ureglia aviarta e schar esser ils quitaus.
La broschura „Sendas historicas“ ei da retrer tier Breil turissem. Ella cuntegn interessantas informaziuns pertuccont cultira e natira, sco era fauna e flora.
Senda historica Survitg
La Senda historica Survitg sa ins entscheiver en Sogn Giacun ni enta Cuort. La ruta ei era indicada sil plan ella brochura. Sin la senda entaup’ins interessants posts, ils quals ein signai entras ina sculptura en lenn e marcai cun ina flur che corrispunda alla pagina el guid.
Senda historica Via da Strada
Essend il passadi el funs dalla Val denter Rueun e Tavanasa bloccaus entras palius e meanders dil Rein, ascendeva la via da Rueun Starpuns si viers Munt Sogn Gieri e Vuorz. Il num Vuorz che deriva dl plaid buortga, indichescha la sentupada da duas vias: quella si da Glion-Rueun e quella neu da Glaruna sur il Pass Veptga.
A Vuorz seunevan las duas vias e cuntinuava sur Migliè viers Breil e sur Dardin/Pugaus, viers Schlans e Trun. Sin quei tschancun vegn la via aunc oz numnada „Via da Strada“.
Il Forum cultural che ha preparau las sends ed il guid giavischa emperneivlas ed interessantas spassegiadas.
