Poesia messa en musica |
Mo aunc in pign mument Spetga ed hagies pazienzia Mo aunc in pign mument; Prest compara l’aurora E clars vegn il firmament. Spetga ed hagies pazienzia, Spetga ed hagies pazienzia, Vonzei sur las vals compara |
Sep Mudest Nay ei naschius igl onn 1892 a Danis. Suenter las scolas dil vitg ha el frequentau il seminari scolastic a Cuera. A Zignau ed en siu liug nativa a Danis ha el dau scola primara. 1920 vegn el engaschaus sco scolast secundar a Camischolas ella Val Tujetsch. Muort ina maligna malsogna ha el stuiu remetter igl onn 1944 sia activitad ella Val Tujetsch. Gia igl onn 1945 miera Sep Mudest Nay ella vegliadetgna da mo 53 onns.
Sper il pensum da dar scola eis el sefatgs meriteivels sco redactur da numerus cudischs da scola. Aschia eis el staus responsabels per tut ils cudischs da lungatg per tut las classas primaras. Ils temas da ses cudischs ch’ein vegni edi ils onns trenta pri ord la veta da mintgadi, ord il mund puril, ord la natira.
Era sin palancau politic ei Nay s’engaschaus pil romontsch e per la scola romontscha.
Sco deputau ha el inoltrau igl onn 1934 la menziun che ha pretendiu ch’il romontsch vegni renconuschius sco lungatg naziunal, eguals al tudestg, franzos e talian. Cun ina maioritad surprendenta e nunspitgada ha il pievel svizzer renconuschiu igl onn 1938 il romontsch sco lungatg naziunal. Per Nay ei quei stau in di da grond success e legria. Il medem onn edescha Nay il renomau Bien di, bien onn! Quei mied d’emprender romontsch ei vegnius restampaus en 7avla ediziun igl onn 1983 per la davosa gada.
Sias ovras ein d’anflar el Tschespet 26.
