Scalutta sil Grep Patnasa
Ils pli vegls fastitgs da veta humana sin territori dalla vischnaunca da Breil darivan dil temps da bronz. Sils dus crests Grep Patnasa sper Dardin e Tschuppina sper Breil dattan scaluttas perdetga da dus stabiliments pli gronds dil temps prehistoric.
El caraun dalla via denter Danis e Dardin sesaulza in crest da circa 50 m lunghezia e 20 m ladezia, il Grep Patnasa. Alla surfatscha da quei grep sesanflan varga 30 craps da scaluttas. La pli gronda cuppa visibla ha in diameter da 25 cm ed ina profunditad da 15 cm. Quellas cuppas ein vegnidas fatgas da carstgauns. Probablamein setracta ei da fetg vegls craps d’unfrenda pagauns. Ils craps da scaluttas survevan forsa era sco calender. Lur relaziun cun la posiziun dallas steilas rinforza quella interpretazin.
Sil crest denter Tschuppina e Flanz sesanfla ina retscha da megalits. Quella ei vegnida scuvretga pér igl onn 1986. Ils cats ch’ein vegni alla glisch entochen ussa lain supponer ch’ei setracta d’ina retscha da megalits impurtonta dil temps prehistoric. La planira ha ina lunghezia da circa 100 m ed ina ladezia maximala da ver 50 m. Cun sias spundas da grep teissas era quei in liug da defensiun ideal. Era las restonzas da mirs schetgs e da rempars da crap lain supponer ch’ils megalits derivan dil temps prehistoric.
