Suenter la dispeta ed il cumpromiss da 1737 han ils da Breil tuttina aunc retschiert bunas novas da Mustér. Ils 24 da december 1746 confirma igl avat Bernhard Frank von Frankenberg en siu num ed en num dil convent dalla claustra da Mustér ch’il vischinadi da Breil hagi scuntrau las obligaziuns enviers la claustra gia igl onn 1738. Medemamein seigi il Vischinadi da Breil secumpraus libers dalla Dieschma gronda dil graun. La claustra vegni a far valer neginas pretensiuns pli enviers il Vischinadi da Breil.
Cun il „Vischinadi“ da Breil ei manegiau la vischnaunca da Breil. Era en auters documents ei buca adina veseivel tgei ch’ei manegiau: il vischinadi ni la vischnaunca da Breil.
