Il zercladur 2017 han las treis vischnauncas dad Andiast, Breil e Vuorz decidiu da fusiunar cun l’entschatta digl onn 2018. Ord treis vischnauncas dat ei ina vischnaunca che secumpona da tschun vischinadis.
Era la historia scretta dils vischinadis Andiast e Vuorz entscheiva igl onn 765 cun la nominaziun el Testament da Tello. Ei dat denton plirs indezis che cumprovan che lur intschess era gia habitaus dapi il temps da bronz.
Schegie ch’ils vischinadis Breil, Vuorz ed Andiast sesanflan quasi silla medema terrassa al pei dil Péz d’Artgas, ein els sesviluppai individualmein senza pli gronds contacts ni collaboraziun. Quei ei semidau pér igl onn 1972 cura che la treis vischnauncas han aviert il territori da skis cun fundar communablamein la societad Runals e sutgeras Péz d’Artgas SA, oz Pendicularas Breil-Vuorz-Andiast.
