El caraun dalla via denter Danis e Dardin sesaulza in crest da circa 50 m lunghezia e 20 m ladezia, il Grep Patnasa. El consista ord crap da verrucano. Alla surfatscha da quei grep sesanflan varga trenta scaluttas. Treis da quellas han ina dimensiun extraordinaria. La scalutta gronda ha in diameter da 25 cm ed ei 15 cm profunda. Plirs indezis cumprovan che las scaluttas ein vegnidas fatgas dil maun da carstgauns. Enten baghegiar la via ha ins anflau ina platta cun sis scaluttas. Quei crap ei vegnius conservaus biars onns el museum Cuort Ligia grischa. Igl onn 2006 eis el puspei vegnius plazzas a Patnasa spel grep. Ella veta dil carstgaun ha il crap adina giu ina gronda muntada. Biaras detgas raquentan da caussas misteriusas en connex cun crappa e greppa: Il grep da striegn, la platta dalla stria, il crap d’unfrenda, la platta furada, il crap dil giavel. A Patnasa setracta ei fetg probabel da vegls craps d’unfrenda dil temps paganil. Forsa survevan las scaluttas era sco ina sort calender. Quella interpretaziun vegn rinforzada entras la relaziun dallas scaluttras cun la posiziun dallas steilas.
