 |
 |
La plazza Isletta ei stada entochen ils onns 60 ina pastira da casa. Lezs onns ha l’Uniun sportiva Danis-Tavanasa baghegiau en lavur cumina il plaz da ballapei. Biars onns ha la plazza surviu sco arena da ballapei pil club da Danis-Tavanasa. Ils onns 80 e 90 ha il Club da tennis Danis-Tavanasa baghegia ils plazs da Tennis e la vischnaunca ha schau ereger ils cundrezs per atletica leva per las scolas da vischnaunca.
Naven dalla stad 2014 ha quella plazza denton era survegniu ina dimensiun historica. Suenter liunga preparaziun e biaras uras da lavur cumina eis ei reussiu al Forum cultural dad ereger in dign plaz per seregurdar dalla sgarscheivla bova dils 1927. Il liug historic consista da quater differents elements. Il monument culs nums dallas unfrendas, la suosta cullas tablas d’informaziun, las restonzas dalla punt da Maillart construida 1905 ed il pei dalla punt devastada fuorman ina unitad. Gest visavi san ins observar il tessaglia dutg dil Lochli che ha a sias uras purtau tala sventira e derasau bia tristezia sur la populaziun da Danis-Tavanasa.
In baun envida da sefermar ell’umbriva dallas plontas e far in paus en buna regurdientscha.
