Naven da 1500 entochen 1900 udevan ils de Latour ensemen culs de Castelberg da Mustér ed ils de Mont da Vella tiellas pli impurtontas famiglias dalla Surselva. Ils onns 1600 entochen 1800 ha quella famiglia dominau ensemen cun ulteriuras 40 famiglias dalla Republica dallas Treis Ligias la politica el cantun Grischun dad oz. Sco officiers oravontut en Frontscha han ils de Latour scret historia internaziunala. Sco giurists e politichers han els influenzau fermamein la veta politica en vischnaunca, regiun, cantun e confederaziun.
Igl origin dalla famiglia ei d’anflar sil Crest Marmarolla. Quella tuor ei barschada giu igl onn 1493 ni 1496. Lu han ils de Turrè priu dimora el vitg da Breil. Breil ei lu adina restau la sedia principala dalla famiglia.
Archiv da famiglia e museum
Caspar de Latour (1862 – 1949) haveva testamentau ch’ils beins culturals, oravontut igl archiv da famiglia, dueien vegnir conservai e manteni dils possessurs dalla Casa Latour a Breil. Il vast relasch duei dar perdetga dalla veta dils de Latour sco officiers en survetschs jasters, sco purtaders da mandats politics ella Republica dallas Treis Ligias e pli tard en Cantun e Confederaziun.
Denter 1996 e 1999 han dunna Rita Theus-Bieler, biadia da Caspar de Latour, e siu um dr. Valentin Theus baghegiau ora in local ed endrizzau da niev igl entir relasch. Cun endinau engaschi e gronda perseveronza eis ei reussiu da saver presentar alla publicitad in ordvart interessant museum che dat viva perdetga da quella impurtonta schlatta.
Guidas el museum san vegnir pustadas tier:
Breil turissem ni Michael Friberg
