Naven dalla fin dil 6avel entochen igl 8avel tschentaner era la Raetia prima in stadi ecclesiastic fetg spatitschaus. La famiglia dils VIctorids / Zaccons menavan quei stadi. Ella metteva il preses ed igl uestg ed exequeva aschia a medem temps la pussonza seculara ed ecclesiastica. Ils 15 da december 765 ha igl uestg Tello regalau ses beins da Sagogn, Glion e Breil alla giuvna claustra da Mustér. Quei ei l’emprema gada che la vischnaunca da Breil vegn menziunada en in document. Quel ei screts en latin e dat in’envesta Ella historia dall’economia e dalla colonisaziun dalla Surselva e naturalmein era dalla vischnaunca da Breil.
Cheu suondan in pèr passadis impurtonts per la vischnaunca da Breil en translaziun libra:
„Era mia cuort a Breil: la casa da mir signurila cun tgaminada, stanzas scaldablas ed in plaun sura, cun in garner, in clavau e suostas per biestga, bargia, curtgin, cuort e tut quei che fa part da quei bein, l’entira entrada dalla cuort, semplamein tut.“
Allura suondan ils nums dils funs che vegnevan cultivai da gliez temps da quella cuort. Denter auter vegnan ils suandonts nums menziunai:
• agrum trans flumen / Starfléms
• pradum in ruane / prau a Rueun (Plaun Rueun)
• agrum vicinares / èr a Vischnaus
• agrum ardunae / èr a Dardin
• pradum anives confinientem ad abatissae / prau a Danis che cunfinescha cun Tavanasa.
Agrum vicinares / èr a Vischnaus
