Florentina Camartin

Fl. Camartin Pren nus, Maria, bein pil maun

Festiv ils zenns han resunau
e pign e grond neutier clamau
da cun Mari’en cuminonza
star avon Diu en si’avdonza.

El sanctuari renovau
honur e laud a Diu sei dau,
ed er salid cordial purschein
a Nossadunna e rughein.

Da Diu savein nus sefidar, 
El teidla nies rugar, cantar.
El vegn cun nus tras dis ed onns,
cumpogna nus e nos affons.

En ses misteris grazius
stat Jesus semper cheu cun nus
el tonsch’a nus siu paun divin
per dar confiert tochen la fin.

Refrain

Pren nus, Maria, bein pil maun
che Tiu sogn fegl pudein suandar.

La sura poesia ha Florentina Camartin scret a posta per la benedicziun dalla baselgia paro-chiala renovada. Albert Spescha ha dau il vestgiu musical e la premaudiziun ha giu liug ils 20 da settember 2020.

Florentina Camartin ei naschida ils 22 d’uost 1943 a Breil. Ella ha fatg la scola da gidontra da miedi a Sogn Gagl. Cun la vegliadetgna da 22 onns eis ella entrada en claustra ad Ingenbohl (Sviz). Leu ha ella fatg la scolaziun da mussadra. A partir digl onn 1971 entochen 1976 eis ella stada directura e scolasta da metodica al Seminari da mussadras. Lu ha ella luvrau sco mussadra e catecheta a Turitg, Mustér e Cuera. Ils davos onns da sia veta professiunala eis ella stada inspectura da scoletta e scola. Naven da 2009 entochen 2016 ei Florentina Camartin stada redactura dil Calender Romontsch.

Survesta dallas ovras